Act 3 | MMX | STEP | At lara laaleng Pita mi ne Jon dugat pas uto vana at loogu laplavang kusu duna lok lising at lavantun konaleng ukantinao, i ngan leme Judaia digak lox amisix i.

aLen 18:15,18,19

bLur 22:18, 26:4

Acts 3

Pita Mi Ne Jon Duga Lox Aroo Laradi

1 At lara laaleng Pita mi ne Jon dugat pas uto vana at loogu laplavang kusu duna lok lising at lavantun konaleng ukantinao, i ngan leme Judaia digak lox amisix i. 2 At lara langas povolo, laasen teren do Lumusaragu Maraanu, lara laradi mo gat kis, luxangkedek teren ga molo axap; nenen ga visik axa i xuren. At levenaleng axap limixin digap kip kaka i uto ap mo langas povolo xusu na ngising panga rin ap mo limixin digat pas uto at loogu laplavang. 3 Ni ga ven ne Pita mi ne Jon duga beles to ap mo loogu, la ni ga sing du xusu duna raba i mi tempanga. 4 Duga ru la duga ven tooro i la ne Pita ga lok tin, “Una ven tinama’.” 5 Mo laradi ga milik tidu, ga nua i do ni mo naba lok ka tempanga atdu.

6 Ketla ne Pita ga lok tin, “Nia xopmen tevempilas gamgames kopla leven gol tarak, ketla ana raba u mi lavanga nia a ruuna i; keneng at laasen at ne Iesu Karisito me Nasaret, a tong i ru do, una ru upana la una vas kaxat.” 7 La ne Pita ga ranga axatu i mi lekngen tino la ga lok aurur i upana. Ap mo mene loxonaleng luxangkedek teren ga lolos ta. 8 Ni ga los kaxat mi luxangkedek teren la ga vas kaxat. La ni ga beles buru midu ukeneng at loogu laplavang gat pas la gat los momo la ga emi asu mi ne Moroa. 9 Mo limixin diga ven mo laradi gat pas la ga emi asu mi ne Moroa, 10 diga ven kibis i do ni laradi singising panga no gat kis to at Lumusaragu Maraanu at loogu laplavang, diga sangu aleng ap mo lavanga ga rupot saparav i.

Pita Ga Paase Ri Limixin

11 Mo laradi move gam tebeng tu at ne Pita mi ne Jon la limixin axap mo diga rakdu aleng la diga sixit posiga nedi ro at loxot silok saparap loogu laplavang diga tong i do ‘Loxot at ne Solomon’; 12 Pita ga ven mo limixin la ga lok tidi, “Leme Israel; lai mo mi sangu ren mumu i na lavanga, la lai mo nemi mi tu la mia reven tooro nama min? Mi doxoma i do ma lox avukat na laradi mi lolos axa atnama xopla at loklok nunuan atnama xusu neni i lox epovo i rit pas? 13 Moroa at ne Abaram, Aisak, la ne Jakop, Moroa at lavalabat atdik, neni ga lox asilok laasen at ne Iesu, lasaxaruki ren. Nemi miga song araba limixin kapmek min kusu dina sev amer i; la miga sok tixirixes i ro melamgo at ne Paelat, ap mo loxonaleng ne Paelat ga lok do na soxomus asu i. 14 Neni laradi dadat la mokmokso; ketla nemi miga lok abulubun kepe i, la miga sing ne Paelat kusu na soxomus asu laradi sepsev amet tadi. 15 La nemi miga sev amet ne Iesu, neni lavasuun at lorooro avolo. Ketla ne Moroa ga lox arooro amlong i basinge lanmet, la nema na ma paase katling i mi mo lavanga mila nema maga ven i. 16 At lunuunu mun at laasen at ne Iesu la na laradi mi ven i la miklen i, ira lok ka lolos maxat keneng at luxangkedek teren. Lunuunu keneng at laasen at ne Iesu na, i lox aroo na laradi de melamgo atnimi axap.

17 La na, luvutnetak mi luvurinuk, nia aklen i do nemi eburu mi luvuttadi amgomgo atnimi miga lox i ri ne Iesu; miga lox i mila mi goxo xasep at levelinga at ne Moroa. 18 Gano migomgo ne Moroa ga vaase asu levelinga at lavaeme vapaase alii ren do Lanarong teren naba xip losongsongot silok; la ne Iesu ga lox asorun mo levelinga. 19 Kuren la mina leeng basinge laxakapmek atnimi xusu ne Moroa naba doxoma xepe laxakapmek atnimi, 20 la kusu ne Moroa ba raba nimi mi lorooro nunuan basinge levenmumuat at nai lavatbung menemen kopok la kusu ni naba riki asi ne Iesu, neni Lanarong; Moroa gara soxolik ka vam i do rinimi. 21 Ni naba nemen to vana at laxalibet se at laaleng ne Moroa naba lox amaxat lempanga axap, kerekngan neni ga tong asu i mi levelinga at lavaeme vapaase alii ren me gano. 22 Kerepmo ne Moses ga lok,

‘Moroa, neni Leeme Silok atnimi naba sak tiki leeme vapaase alii naba vot kantubu atnimi lubungmixin me Judaia, i ngan ni ga sak tiki ia. Mina ronga levelinga axap neni naba tong i rinimi. 23 Do tara i xopara na ronga levelinga ren, neni naba nemen petpes basinge mo limixin ne Moroa ga soxolik ka vam nedi do ateren to at lorooro melemu; la ne Moroa naba sev amet nedi axap ding tonga xepe levelinga ren.” ^a

24 La ne Pita ga lok bok, “Lavaeme vapaase alii ga vaxaru ka i at ne Samuel la nedi bok lentaba diga rupot melemu ren, nedi axap diga paase alii mumu lorooro at Leeme Silok. 25 Nemi mi ruuna laxakaape at ne Moroa keneng at lavaeme vapaase alii ren, la nemi mi nemen keneng at nom lekabus no ne Moroa ga lox i eburu mi lavalabat atnimi, kerekngan ni ga tong i ri ne Abaram keretna.

‘Keneng at livipisik li ram, nia anaba lox anarong limixin axap at lavatbung menemen.’ ^b

26 La kerepmo ne Moroa ga soxolik ka lasaxaruki ren la ga sak tiki i udo parap nemi avot kusu na lox anarong nimi xeretna; ni na lok nimi xusu mina ven kibis laxakapmek atnimi la mina leeng basinge laxakapmek atnimi.”